صيورها تتوازي...

صيورها تتوازي....ويبانوا التريس ويطلعوا الهدرازه....صيورها تلتم....وصيورها تصفي تشيل الغم....وصيورها ترتاح بعد الهم....تولي ربيع وخير بعد العازه....يصابولها هلها تريس إسقم....أصحاب الضماير صافيه ركازه....صيورها في القمه وصيورها تجمع الشمل تلمه....وحق من رفع موسي ورده لأمه....ونجا سفينة نوح بان أعجازه....ويوسف لبوه وسط خوته ضمه....ونجا في بطن الحوت يونس حازه....يروق وطنا تنزاح عنه الغمه....إيبانوا التريس....صيورها ترتاح وصيورها تبرأ بعد لجراح....يعاود زهاها والبلا ينزاح....إيجيها الفرج ترتاح مالخرازه....يوقفولها هلها صحيح صحاح....تاريخهم واضح وضوح إنجازه....هادوم رسوتها أولاد إسماح....أولاد عز ماهم كيف مفرخ زازه....صيورها تصابه....تريس وطنا جمله تجي تزابه....يفكوه من السمسار والنهابه....إللي الوطن يحسابوه كان حوازه....كمشة هبد متخلفه نصابه....وأنجاس ترباية شوارع كازه....مافيش منهم حد تام إكتابه....تعليمهم كله في وسط مغازه....لكن الوطن اليوم فيه شبابه....بعون ربنا يصعب علي النقازه.