مسا الخير ياوطن اهلي وناسي يا تاج راسي

1مسا الخير
مسا الخير ياوطن اهلي وناسي
يا تاج راسي
نمسيك بالخير واحلا التماسي
مسا الخير يا عيلتي يا حبابي
وجملت اقرابي
مساء الخير يا رفقتي يا اصحابي
وجملت اللي يسمعوا في جوابي
ومانيش ناسي
جاري اللي حيط ساسه فساسي
مسا الخير يا وطن فيك الغوالي
شاغلين بالي
على شانهم قلت صدري الخالي
ومازلت هو انت لول التالي
مالك احساسي
ياملك لحساس يا نخب كاسي
مساء الخير يا وطن بالخير واعد
في القلب قاعد
لا هنت لا تهون مهما نتباعد
من اجدير للوسط حتي مساعد
وثابت وراسي
قريتك فتاريخ فصلي الدراسي
مسا الخير يا وطن جرة اجدودي
ومعني صمودي
من البحر للبحر ضد الحدودي
لانته اسرائيل لانا يهودي
يخسه الخاسي
ما نبدلك لين تخرج انفاسي
مساء الخير يا عاصمه ويا الهاني
وشهداء السواني
الماظي اللي نعاوده للمعاني
رويناك بالنهر والدم ثاني
تردي مراسي
فراقيط وتجيب مجلس رئاسي
جاتك وجاك العسل في الرواني
فالزمن القياسي
اللي عقبه الكيب قله الحاسي
مساء الخير يا احرار كل القبايل
يا ارث هايل
جبارنا ومرابطين تشفي الغلايل
حرابا من الشرق حتي النوايل
اللي شداد باسي
ثقال روز وجبال كيف الاوراسي
مسا الخير يا وطن مرتع كحيله
عفي للهميله
طول عرض تطويه تغبط فسيله
تعقد علي ثلب سيمه وعزيله
جى عصر ماسي
مروح ولاوين ناره خراصي
ماس الخير يا وطن شامخ مسمي
فقمة القمه
حاضن مزاريع نخوه وهمه
وعزه بورافيل تجري لي المه
وسياد الخماسي
وراشيف وطبول سبعه ونواسي
مساء الخير ياوطن نخوه وعزه
سلامي اندزه
تصيغه عواقير تختم الكزه
اللي وين ما تصير خضه وهزه
العوجه تواسي
ولجبال لي لارض ديمه رواسي
مسا الخير يا صاع وافي اعباره
وكل من جواره
مالجبل لشط حتي اجفاره
ومن غات لا عند سبها الشراره
الجفره قياسي
من سين لا صاد وافقي وراسي
مسا الخير ياوطن ريحه تعلت
اللي هناك قلت
لا مال لا رجال ماشي خلت
مناجل بلا نصاب وطني تولت
والنجم السداسي
يرفرف مع رن جرس النحاسي
مساء الخير يا وطن فوقه ضبابه
مضيع شبابه
مخلط علي اعداه ودر احبابه
اللي كان مهاب حامي ترابه
ناسه تساسي
كله جبابين بورسة مأسي
مساء الخير ياوطن طيب نفاسه
واشراف ناسه
حايس ولا حد شاقي بمحاسه
هاين بعد كان نحلف براسه
بدا للتناسي
ومعرض توابيت بعد العراسي
؛؛؛؛؛؛؛؛؛؛؛؛؛؛؛؛؛؛؛؛؛؛؛
مساء الخير ياوطن هجر احراره
ويتم صغاره
اطوطي من الظيم تحدب اكباره
مظلم بعد كان تشكع انواره
اطلمس طماسي
اعياد وعواشير كله مناسي
مسا الخير ياوطن غربه تغرب
اسناحه تخرب
اصرم بعد كان تاقي مزرب
يلوي ً مع ريح غربي اشرب
طار بحماسي
اصلب علي احداش لول الفاشي
مساء الخير ياوطن شرقه تمازه
يريد الموازه
مسمس مع السمس قاطع نفازه
سامع مهاميز فايت اعزازه
حلم في نعاسي
حسبها وجت كيف لعب الكراسي
مساء الخير ياوطن ناسي جنوبه
ثامن اعجوبه
نهره اللي ماه حد العذوبه
هملوه ويصدقوا في اكذوبه
ربيع التباسي
وخشوا فقرطاس سبسي السباسي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
مسا الخير يا قبور فيك البطوله
واعظام الرجوله
يا رتل وين طاح طاحت الدوله
ومن يومها تنس تمشي معلوله
عالنه الفلاسي
وهلها طوابير فيها سواسي
مساء الخير يا وطن مدنه انشقت
للغرب لقت
وذيول فذيول طمعت وهقت
ماتقول لا عز لا شان حقت
انشق السياسي
ولحقه اللي حر والدبلوماسي
مسا الخير يا وطن فاقد الهيبه
مولي زريبه
وتصول وتجول فيه الغريبه
وشيب المساجين يشبه لشيبه
فيه الحباسي
من الشاب للشيخ لم القصاصي
مسا الخير ياوطن بعدً تكرم
اشرك اشرم
عقده الملقوط فرطه اصرم
وناسه علي بعض تمت تهرم
وتريد القصاصي
من بعضها وبعض ناوي لخناسي
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
مسا الخير ياوطن باحت اسراره
وبوبح خصاره
منفور منبوذ مجعز لجاره
جوازه زطل طاح ميجيب باره
اللي كان قاسي
داسوه حطوه تحت المداسي
مساء الخير يا وطن طاحت فلوسه
وحتي اضروسه
فلعظام والناب تنخر السوسه
بدا القتل والثار حربه بسوسه
وصل سن يأسي
يبي حصن تحسين من شيخ فاسي
مساء الخير يا وطن ظل من طريقه
شحته دقيقه
مكابر وما يبيش يسمع حقيقه
مخلي اللي ينشله من غريقه
وعاكس عكاسي
سكران ما يبيش عد الطواسي
تبقى علي خير هي بالسلامه
ونبوا اعظامه
الفارس اللي كان عز وزعامه
وحتي الحذاء والعباء والعمامه
اطيب النفاسي
بعدها وما عاش تسمع رصاصي
وموش كل من قال تسمع كلامه
وراسك وراسي
اللا يبوك ياوطن سوق النخاسي