تواصل الحراك الشعبي المؤيد لسيف الاسلام

يعطيك الصحة اخونا الشابي دائما في الموعد.........
و هذه هديتي لك
المرسول
حيل غايتي مرسول مني وليا
صافي النيه
ندزه لناس اعزاز ، غابوا عليا
حيل غايتي مرسول يمشي قداهم
ويقعد اعماهم
يجيبلي تفاصيل واخر نباهم
بي اعيالهم بي ارجالهم بي نساهم
يجيب الضويه
مضمون ماهوش خالي قضيه
يامرسول اطرف يالاهم
جيبلنا لعزاز باهم
من طبرق بدي
قل جواب كتبته بيدي
لبلاد اتنير وتسدي
يارب يسلك مسداهم
درنه كيف حالك
وقوللها ماضاع جمالك
لازم يصفى شلالك
واللي ارعبوها ، تنساهم
البيضاء وجبلها
والباكور القبه وهلها
رايتنا من لون جبلها
مازلنا ، ما بدلناهم
حيل غايتي في السبت يطلع فرادي
يقصد الوادي
لاحد لثنين بيكون غادي
ويقيم يومين ضيف الاجوادي
بوجبه هنيه
والثالثه بالوز والكاكويه
يا مرسول اطرف يالاهم
جيبلنا لعزاز نباهم
المرج ولبيار
وزور بنغازي دار بدار
وقل سلام لهلها حار
اولادهم ورجالهم ونساهم
اجدابيا وسلوق
وجالو وجخره والطوق
لاعند الكفره، مطلوق
سراحك ،لين تنال ارضاهم
مسي لبريقه
وبشر ولعقيله ولحريقه
تلقا مدعكها، وطريقه
حيي ،شهدانا ،ودماهم
حيل غايتي مرسول ماهوش كاره
ولا الكبد داره
وتحته وفي يديه مركوب فاره
ولاهوش عيان طارب وشاره
شق الحطيه
عنده تقول غير شربت اميه
حدر مربوحه
وتوصل لسرت المجروحه
راس المال فداها بروحه
وهلها ماهو هاذا اكفاهم
والجفره وزله
اوادي لبلاد ورفله
وزليتن والخمس اتقله،
حار سلامي لمحياهم
عدي لمصراته ،
عزيها ،عللي ، نفراته
ونبهها عللي راماته
راو عليهم ماو اعماهم
حيل غايتي مرسول كمل اشغاله
ومرتاح باله
يوصل حمد رمضان ينقل رساله
يقوله يقول ،لخوك وطنك، فحاله
وناسه شقيه
من غيبتك ، لليوم ، ماله هويه
قوله في حاله
وطنك راح وسرقوا امواله
واللي في عهدك رجاله
ما تعرفهم ، لو تلقاهم
قوله ولينا
تبع والعظمي روينا
كيف الكوره يطبوا فينا
اللي في الخيمه ظيفناهم
عدي للاسره
وقوللهم ما ادوم الغسره
وما بعد العسرا الا اليسره
ربي عادل ما ينساهم
حيل غايتي مرسول نيته نضيفه
وروحه خفيفه
ندزه للناس اعزاز ونضاف كيفه
حيي ، ترهونه
وقوللها راكم في عيونه
روين زيتونه زيتونه
بدم ضنانا ودم، ضناهم
زور جبل نفوسه
الحيطه والنبته. المغروسه
قوللهم ينسوا الكابوسه
ويعودوا ليام زهاهم
سبها ،والشاطي
،واوباري وفي غاث تواطي
وع الاحروف تحط نقاطيً،
للتاريخ اللي رقاهم
نا تارقي من البو وام تارقيه
والوطن فيا
لا خنت لا نخون ونشد عليا
نا تارقي مالبو، وصافي حليبي
وطني جبيبي
ونعيش في غات ونموت ليبي
ماتوقف سير،
من غدامس لاراس اجدير
هلهن ليهم شان كبير،
فزعتنا وهك عرفناهم
حيل غايتي مرسول مابي يتوصه
ولا فيه خصه
ولا الي ندزه، بيه عنده يدسه
ويمشي لراس اجدير يعمد العسه
ثنيه ثنيه
لاعند ، لعجيلات ، خوت ، الحميه
حيل غايتي مرسول صاحب ادباره
عنده شطاره
ياخذ جوابي طول يعمد ازواره
ما يفرحوش بقظ خصم الاغراره
ونقل الرزيه
اللي يظحكك مرات شر البليه
يامرسول اطرف يالاهم
جيبلنا لعزاز نباهم
الزاويه وصرمان
وصبراته حتي حشان
وجنزور ، وعقد الفرسان
سبع اطبول ،وهلها راهم
حيي لبواب
طرابلس ما تنساء باب
وقوللها ،ملقانا ، طاب
رايفنا ،لهلها ، شتقناهم
ارجع بسلامك
عجل فيسع خف اقدامك
تلقاني ،نرجي ، قدامك
مشتاق ،اخبار، هواليها
يا مرسول وصلت احكيها
رحلة ، لبلاد ، وما فيها
جيت ونحكيلك
حتي هي في شوق مثيلك
مليون تحيه تهديلك
وندعي ،مولانا ،. يهنيها