قصة من أرض الواقع بقيادة فخر شباب ليبيا الشهيد المعتصم بالله معمر القذافي. ملحمة 12/9 "خطة المعتصم بالله" التفاف الموت

ملحمة 12/9 "خطة المعتصم بالله" التفاف الموت
في بداية شهر 9 كنا نجهزوا في ارواحنا لان العدو كان قريب من سرت وكانت قوتنا بسيطة وكان اغلب الشباب مدنية بس كانو اسود ربي يحفظهم ويرحم اللي استشهد منهم
في يوم جانا الشهيد المعتصم ومعاه منصور ضو ربي يفك اسره وسلم علينا وتفقد المجموعة وقوتها
يوم 11/9 طلعنا الفجر وما نعرفوش الوجهة وين والاوامر شني هيا
كان امر العملية الافندى ط ب ط وكان امرنا الشباب المطوعين الشهيد عماد جبيل مجموعتنا كانت شباب صغار في من مواليد 92 و 94
التحقن بينا سيارات اخرى واصبح عددنا حوالي 40 عليهن دوشكات و14 و106 و سيارة تقريبا 23 وسيارة جراد مجزأ وراجمتين
توكلنا علي الله في الصحراء من الساعة 8الصبح تقريبا الي الساعة 5 الفجر ومفيش حد عنده علم بالمهمة او وين ماشيين
بعد المسافة هذي كلها كل واحد توقع انه مش حيرجع لان لو شافنا الطيران مستحيل يخلينا نرجعوا يعنى يقدر يدمر القوة كلها وهو متريح المهم وقفنا نستريحوا ونملوا الوقود واى واحد يذكر اليوم هذا يذكر الالتماس اللي صار للراجمة والصاروخ اللي طلع من الالتماس بس الحمدلله مفيش حد انظر ولا طاح قريب من العدو
كنا نشوفوا في ضي مدينة علي بعد تقريبا 80 كيلو او اكثر وكل واحد توقع منطقة واحد يحسابها بن جواد والاخر البريقة والاخر راس لانوف . هكى فهمنا انه التفاف
كملنا طريقنا بسرعة بطيئة وبعدها وقفنا وجتنا تعليمات بالهجوم علي منطقة راس لانوف وضرب الفندق لانه كانت فيه مجموعة اجنبية
وصلنا الساعة 9 علي متلت راس لانوف وبدينا الرماية علي الفندق وصار اشتباك مع العدو ودمرنا العدو ومات منهم تقريبا 19 وااشباب كانت معنوياتهم مرتفعة فوق وجتنا الاوامر من الضابط ط ب ط ربي يحفظه كان اول سيارة تتقدم واخر سيارة تنسحب
امرنا بالانسحاب من نفس الطريق والعودة وكنا نستنو في الطيران يلحقنا بس الحمدلله ربي عماهم علينا . يوم من اجمل ايام العمر تعرفنا فيه علي تريس ربي يحفظهم ويرحم اللي استشهد منهم ان شاءلله