رغم الوجع

ريم سالم

رغم الوجع.....................................................................................

مازلتو يا خوتنا تعزوا علينا..
رغم الأسى والحزن والألم..
ومازلتو ماتهونوا علينا..
رغم الشدة والقسوة والظلم..
ومازال خوُتكم دم يجري فينا..
لا نقدر نعيش بلاه ولاندير فيه السم..
ومازل الروح عنكم تنشد فينا..
رغم ماشايل القلب من هم..
رفعتوا السلاح فوجهنا مقادينا..
قتلتوا الولد وحرقتوه قلب الأم..
وين المودة وينها العشرة الزينة..
كبر الجرح وصار مايلتم..
تبعتوا قنوات عبرية وكدبتو اللي هن لينا ..
سبيتوا وشتمتوا قدام هالعالم..
قطعتوا حبال الود لين قسينا..
بعد كفرتوا الليبي اللي مسلم..
رغم انكم جبتو الغازي لينا..
دمر بلادنا وأطفالنا يتم..
صواريخ كي المطر تنزل علينا..
و نشوفوا الفرح فعيونكم يبسم..
منين جت القسوة والعدو محادينا..
ومصيرنا واحد لونسلم..
الموت يوم ويوم تاكل فينا..
تعالو نكفف جراحنا وشملنا يلتم..
لو هانت عليكم ماتهون علينا..
لا ماتهون نفدوها حني بالدم..
مازال في أمل تعودوا لينا..
ننسوا المشاكل وخلافنا نردم..
تعالوا ومدوا يديكم لينا..
نحموا بلادنا ويبقى وطننا سالم..
ويفقد الغازي أمله فينا..
ويجر دنابه خازي ونادم..
تعالوا ومدوا يديكم لينا..
الوطن ياخوتي مثيل الأم..
نزعل ونرضى ويبقى حنون علينا..
لما ينادي ماحد يتكلم..
نلبوا نداه بارواحنا وبيدينا..
يارب سماه وترابه تسلم..
ويحفظ بلادي الحنونه الزينة..
ومايحرم واحدكم من حنان الأم..
والله ليبي مايهون علينا..
لوكان بدل المي نشرب دم..
والله ليبي مايهون علينا..
لوكان نفسي بالحياة نردم..
والله ليبي مايهون علينا..
إلا الخونة وبايعين الذمم..
نلبوا ثرا بلادي اللي ينادينا..
ومانتقال ولا فيوم تمشي فينا..
الليبي يسلم بلاده للعدو اللي فخيرها ياغم..
والوطن ياخوتي مثيل الأم..
لا نبيعه ولا نبدله ولاحبه من ترابه نسلم..