من يجرأ يقول هذا مش معقول ذكرى

https://aljamahir.yoo7.com/t29153-topic
.............................................................
حروف مني ,, الى "الكيلاني",
يبدو ان ملحمة من "يجرأ يقول ,,هذا موش معقول "!!؟؟ قد عبّرت بعمق وبوضوح وبكل شفافية عن واقع أليم فظيع شنيع , صنعتة المؤامرة الفبرارية اللعينة ,, وانتجته الخيانة والعمالة ,, وكرّسته اللاوطنية واللاشرعية ,, وولدته الفوضى اللامتناهية , وجسده الفشل الذريع والانهيار اللامحدود ,
ولقد ابدع شاعرنا المناضل الكبير "الكيلاني" في رسم ابياتها وحفر سطورها التي انبثقت من لب المعاناة ومن بطن البؤس ومن قلب التشرذم ,, تعبر عن لسان حال كل المشردين والمهجرين والاسرى والمعتقلين والحيارى و الحزانى والمفجوعين وكذلك التائهين وهم في ديارهم وما هي بديارهم ,, لسان حال حال كل الليبيين !!
احس واشعر ان هذه الابيات قد رسم حروفها وشكّل مفرداتها كل الليبيين وبكل شرائحهم ,, اشتركوا جميعا في نسج جمل هذه الملحمة الغنائية العظيمة , كل منّا خطّ حرفا او رسم كلمة او شكّل جملة , فتلملمت و أنتجت واصبحت ملحمة "من يجرأ يقول ,, هذا موش معقول ؟؟",, ويا لها من ملحمة فريدة !! ,, أستبطأنا قدومها , فأتتنا جامعة مانعة مترجمة لكل احزاننا وآلامنا و أنكساراتنا ,, فنعم الأبطاء ونعم التأخير ( لا يهم كم غاب ولكن الأهم شن جاب ) ,, وكم كانت ابيات نهاية الملحمة رائعة وعظيمة ,,,لقد صدقت فأبدعت يا كيلاني ,,,
من طرف اخي  الحاجي الحاجي ,,نقلته لكم العربي
==================
من يجــرأ يقــول,,, هــذا مــش معقـول؟؟
......................................
ليبي بن ليبي من ليبيا مهاجر مليــوع
وليبي في ليبيا غير جثه, رأسه مقطوع
المهاجر يدعي ياواقي
والرأس يدّور عالباقي
والباقي كارس في بيته , يندب مفجوع
يفطر رصاص وبارود ويتعشى دموع
والناتـو يقـــــول ياحبيبـي
ياليبي فلوسك في جيبي
انت غير اطلب نا واتي قصفك مشروع
،،،،،،،،
من يجــرأ يقــول
هــذا مــش معقـول؟؟
وين اللي جونا ومنّونا بعيشة لبراج
وبماس مرصع بالذهب ولؤلؤ والعاج
وين اللي جونا ووعدونا
زرّاع الفتنه والخونه
كيف ليبيا الامن ولمان انقلبت كراج
والليبي مقطع ومريّش ترييش دجاج
والناتـو يقـــــول ياحبيبـي
ياليبي فلوسك في جيبي
انت غير اندّه ياعيوني قصفك مشروع

من يجــرأ يقــول ,,هــذا مــش معقـول!!

فات تسونامي اللي صار وفات الزلزال
مش هدم مباني ولا نفط ولا خسارة مال
تمزيق الوحده الوطنيه
وتهديم لبنيه اجتماعيه
والدم اطرطش وانذال تذبح في ارجال
خشتنا فتنه ادّشدشنا كيف القلاّل
والناتـو يقـــــول ياحبيبـي
ياليبي فلوسك في جيبي
انت غير اندّه ياحبيبي قصفك مشروع

من يجــرأ يقــول ,,هــذا مــش معقـول!!؟

قال المهاجر للصامد من ريت وراكك
قاله مبيـــوعــــه محظــوظ وربي نجـّـــــاك
قاله شن رايك بنروّح ونموت هناك
قالـه يالـــجرب رد بالك ترجـــــع مـطــــلاك
قاله ملّيت ومن الصاعب تنسى مرباك
قاله وين جــــدك عقّبـلك ولـــدك يلقــــاك
قاله لاتيأس زيد حاول واصل مسعاك
قاله باعـــوها ونقـــولك طـــبّس تخطــــاك
قاله تلحقني تونسّني نعيش نا ويّاك
قالـه فــريت بـــجنحـــــانـــك واحــنا فتّناك
قاله كيف صار بهالسرعه تبدل مبداك
قــالــه مـش ذِلــــــه يامـهاجر مكـره اخـاك
قاله مضايق ليش تبكي شللّي بكاك
قاله مالغــــــوله يامـــهاجر وصــلت بشراك
قاله بالله كيف صار فبيتي يالاك
قاله الله اكــبر تمشيـــط وجــارك هنــّــــاك
قاله السياره خلّيت المفتاح معاك
قاله بالدوشكه في الجبهــه تاك بــعد تاك
قاله مزرعتي عطّشانه و اسقيها أحذاك
قاله مانطلع بيش نسقي ,شكلك هــرّواك
قاله شويهاتي خلّطهن تقرب معزاك
قاله الله واكبر ,داروهن محشــــــي وبراك
قاله فليساتي خذ بالك ربي يرعاك
قاله الله واكبر رفعوهن من الســــوّ أفداك
قاله ع الراتب راجعلي تسلم يمناك
قاله الله واكبر ماسمعتش ماو عــــــزلناك
قاله اذهيباتي الله يرحم هلّي ربّاك
قاله تمشيط وتجـــريف وتفقيـــع اسّـتاك
قاله الشيباني بابايه حقي ورّاك
قاله انســــــى باتك ياولده طنّوه نسـاك
قاله العويله ونّسّهم يرحم باباك
قاله تكبيــــر وركّـبّنـا فيهـــم شكشـــاك
قاله عيلتنا اولاد عمي فيش حد مسّاك
قاله تكبير وجـوا حضــروا بيعـك وشـــراك
قاله واصحابي واحبابي من منهم جاك
قاله ماو قتّلك من لـوّل تغرد هــــرواك
قاله عمدتنا بالمصري جاكش رضّاك
قاله الله واكبر من صبعه هو اللي جـلاّك
قاله نسابانا وجيرانا انشقّوا معناك
قاله تكـبير ونـكــروك ودايرين عـــــــزاك
قاله القبيله شاكيها و تسمع شكواك
قاله العمايم فـــوق منها طربوش اتراك
قاله كلّيتي ودكتوري فيش حد كافاك
قاله دكتورك تو يقـــرأ هللـي قــــرّاك
قاله شركتنا وشركانا فيدني بأراك
قاله عفّينه صنّتهم فاحت حيشــــــاك
قاله و ثروتنا انا شايف دخان وراك
قاله شالـــوه العــــدّاد وحـــرقوا لتناك
قاله العداله والقاضي فيش حد حماك
قاله تهموك وحكمــوك ولا حـــد بــرّاك
قاله العلاّمه لفرادي البركه هضّاك
قاله حلّلك في الناتو فراشك وغــطاك
قاله الزياره حاولي وحياة ضناك
قاله يصير منها كان تلوي شملة جدّاك
قاله مولانا يقدّرني على ردّ أكّفاك
قاله مــولاي غـاصــرني وقتله يرّجـــاك

من يجــرأ يقــول ,,هــذا مــش معقـول!!؟

قاله اللي صاير تقديرك بيها لا وين ؟؟
قاله تمشّطنا وكبّرنا ومـانا عارفيــن
قاله في الجنه اللي ماتوا مالليبيين ؟؟
قاله الله اعلم شكّكّهم فيها بوعيــن
قاله مفتينا شنّ رايه فباقي الحيين؟؟
قاله قاللنا العــملــيه فيهـا قـــــولين
قاله العلاّمه شن فاتي في المسجونين؟؟
قاله في نيته تحويلهم قرضــــاويين
قاله كيف رأيه وتدبيره في الامنيين؟
قاله التآسف ضــروري للقطـــــريين!!
قاله في الداخل في ليبيا مهجّرين
قاله ترحيلهم حمــايه للـمـــدنيين
قاله كيمون يرافقهم ويجوا راجعين
قاله الكيماوي مراجيهم ويردّوا طين!!
قاله الحراير والشرطه والصحفيين
قاله الله واكبر هاذوم الشهداء الحيّين
قاله أدبانا وكتابنا والفنانين
قاله في ذلك يتنافس المتنافسين
قاله قالولي ربحوها المتسلقين
قاله ربيع ولاقوه امبارك والزين
قاله قالولي وتعدّوا في جيش متين
قاله الكرامه نردّوها لفلسطين
قاله ني شايف فوق رأسك فيه اعلامين
قاله تكبير انشالله يطقّن عشرين
قاله لذاعه والشارع فيه نشيدين
قاله الله واكبر ماتخاف الزوز محفوظين
قاله لعلام بما نسمع فيه خطابين
قال ليبيا حره الناس تبي الدنيا والدين
قاله جيرانكم حواليكم مش مرتاحين
قاله هبدّنا وهيشرنّا وهم محطاطين
قاله والهجره والسود ولفريقيين
قاله الزريبه في الغالب فيها فـــمين
قاله طائراتكم ياعاطل يامحروقين
قاله في القمه فنيّه ومــكانيــكــيـين
قاله قالولي يبّتزوا في المخطوفين
قاله الاجابه لزيدان ولـــ بوســهمين
قاله قالولي فيه ازمة غاز وبنزين
قاله قالـــوها تأليــــــف المـــــؤيدين
قاله المدارس خبّرني امتي فاتحين
قاله القرايه مافيه وكلهم ناجحين !!
قاله ياصامد فلّست وشوفلي قرشين
قاله المصارف وجيوبي فاضيه وخاليين
قاله الأيجار أمبهدلني وركبني الدين
قاله المقابر تسكنها و كيفك واجدين
قاله العويله بيقروا وخالي ليدين
قاله تنكرهم والأحسن قول سوريين
قاله الجواز ولقامه سقّطنّ لثنين
قاله بيع وطنك وانسب ع الأوربيين
قاله دزّ امي مع عيالك قالوا جايين
قاله المهابط بالبردوزر محروثين
قاله الصوت راح عاودّلي مؤخر بعدين
قاله الضي هارب وخيوط نحاسه سارقين
قاله ولمّيه والناس اللي عطشانين
قاله الطحالب بتّكذّب في الغطاسين
قاله المثابه واللجنه والثوريين
قاله بطـّـلنا ورجّــعنّـاهـــم قبلييـــــن
قاله الدستور وتفكير المفكرين
قاله بنردّوا الما قبل التسعـــه وستين
قاله صار زايط يحفظكم ربي من العين
قاله في كل لحظه نقروا في المعوذتين
قاله بمعرفتك ياصامد لاوين ماشيين؟
قاله الأجابه تأخذها من المنشقين

من يجــرأ يقــول ,,هــذا مــش معقـول؟

قاله عالملعب من رابح من خاسر فيه؟
قاله أيه عاوني من عندك قول معاي ايه
قاله والجو الملوث من بيصفيه؟
قاله اللي جابه يامهاجر بيعدي بيه
قاله والظلم اللي صارخ قلّلّ واليه؟؟
قاله يظل ماضي بعون الله صفحه وتطويه
قاله والليل المطّاول من بيجليه؟
قاله لها هلها مايناموا عوّال عليه
قاله والمخرج من الورطه واللي نعانيه؟
قاله اللي افبالك وفبالي بنّجيّه انّجيّه !!!!!!!!!

قاله اللي أفبالك وفبالي بنّجيه انّجيه !!!!!!!!!
قاله اللي أفبالك وفبالي بنجيه انجيه !!!!!!!!!

من يجــرأ يقــول ,, هــذا مــش معقول ؟؟!! 
.........................................
رساله الي كل من يحب الوطن ليبيا مع تحياتي