هلوسات ليبي .. الخميس 2014.11.06

هلوسات ليبي ..
الخميس 2014.11.06
محكمة !!!
طلاق بوسهمين من السيزر باطل .. باطل .. باطل !!!
مع اني ضد فضلة مؤتمر الــ200 اللي صايرلهم زي الدودة اللي في تلفون البيلة كل ما تأكل تزيد تطول !! ومع أني نشجع في فريق البرامنة ضد فريق القساورة !! بس في المجمل كلهم يأكلوا في ليان واحد !! وعلى هذا الاساس يجب على عيت جلال الامتثال لحكم المحكمة الدستورية على اعتبار ان القضاء كان غير نزيه في عهد التاغية وتو بعد المباركة أصبح مسطرة !! كما أطلب من عدالة المحكمة القبض على جميع من يؤيد البرلمان المنتخب منهم !! أو على الاقل استصدار قانون يجرم الحديث عن البرلمان أو تمجيد العرس الديمقراطي !! كما الفت انتباه السادة القضاة إلى إن فيه شوية مساجين ما يفوتوش الــ30 ألف ممكن نسوهم الملائكة اللي سماهم ثوار مازالوا ما حقق معاهم حد من 4 سنوات !! والنسيان يصير عادي قديش منهم الثوار عاد !! كما لا انسى ان احيطهم علماً بانه فيه شوية نساء وأطفال ما يفوتوش الــ 40 الف عايشين في كامبوات ليهم 4 سنين !! وانا على يقين ان هؤلاء الــ40 الف هم المذنبين لانهم سكنوا في مخيمات من غير ما يعلم بيهم حد !! يعني الذنب ذنبهم ليش ما يقولوش انهم سيبوا حياشهم !!! وايه حق فيه شوية ناس برة البلاد هما مش هلبة ممكن 2 مليون بس حتى هما طلعوا ومعاش يبوا يولوا !! لكن لازم تجيبهم المحكمة الدستورية بالقوة غصباً عنهم !! وعلى ذكر الدستورية تي هو الدستور قاعدين يمخضوا فيه ومازال ما فيش دستور !! باهي من جت صفة الدستورية للمحكمة !! ممكن قصدهم انهم من نفس عائلة الولد السمين اللي كان يطلع في المرحومة قناة العاصمة اللي كان يقول ( اني التستور تفضل شن تبي ) !!؟؟ يالله عليك حمد !! وفي ظل هالرخاء والنعيم والرفاهية والحرية وراحة البال يطلع عليك واحد يقولك ندوش بالمالقي !!
ياسيدي إن شاء الله حمام الهناء !! المهم ردبالك تطلع في التيار !!!
وسامحوني (نهلوس )خوكم كلام عرب

رائع

ر و ا ئ ع