معادش نبوها تكون كيف دُبي غير بس لينا رجعوه الضي

معادش نبوها تكون كيف دُبي
غير بس لينا رجعوه الضي
نبوها تقول تشاد
صحرا وقش حياشها ورشاد
عايشين فيها كيف مامعتاد
سعادة وراحة وبال متهني
ليش المباني مالية البلاد
نبوا نرجعوا لعهد السنوسي شوي
وبدل الكراهب نركبوا الجواد
مراح بالمعيز وضان متعبي
والقافلة تقطع فجوج بعاد
تجيب فالمقات لناسها وتجي
النسون زفاقة يدير للميراد
قرب على ظهوره دوب مايمشي
فالليل لا مايعرفوش رقاد
تغزل الصوف وبالرحى ترحي
عل شان الحطب تسري تخش اهواد
سناح بيتها منه يكون اتقّي
مهاجاة في رغاطة الحصاد
هااا هااا هااااا هاا هاها هي
غنى الشعر والكشاك والمجراد
بزكرة وطبيلة الفوق اعلّي
هذا حلم ماظنيت ليه اعواد
انشد اجدودك ان حد منهم حي
كل شي خوذوا وريحونا عاد
تعبنا وما فيناش حيل بقّي
بدت ليبيا كيف شجرة الميلاد
من وين يطفي ضي يولع ضي
في ليبيا تقول خاشين عناد
لا الشرق لا هو الغرب متهني
الناس فالجنوب تقول عنا بعاد
ما فرق بين ميت وبين الحي
مانيش متشمت ولا نقّاد
حاشا وكلا تكون صيفة لي
الا غير واجعني الوضع وساد
ياسر مهازل سادنا يكفي
طاح قدرنا ما عاد لينا راد
من يوم مالفارس هذاك أغبّي
يالله ندعوا فيك ياوداد
فرج علينا الوضع متردي

‫منقول‬ طارق قرضاب

وهذا هو الحال في ليبيا.......................واللي يقهر الشعب عليه اللعنة ميت