دليل أم واكيم للطحلوب الحكيم

عزيزي الطحلوب لن تكون طحلوباً حقيقياً الا اذا تتبعت الخطوات التالية :
- المبدأ لايتجزء ياجماعة عشان تكون طحلوب اصيل ماتقعدش مقاطع خالتك راقدة الريح لأنها تأيد في فبراير وفي نفس الوقت تواصل في عيال عمك وانساباتهم واصحابهم وجيرانهم لمجرد انهم افراد في مليشية ماسكة حوشكم وارزاقكم.
- ماتقعديش تقودي حملات على الميديا لرفع المعانات عن اهالي تاورغاء واهالي سرت وانت على نفس ذات التاب تجهزي في اوردر لشنطة ماركة ديور لبتاتك.
- ماتقعدش طالع وقفة احتجاجية في دولة مجاورة لإطلاق سراح الاسرى وانت واقف مصوربجنب سيارتك الاند روفر ولابس الكاب الغوتشي بجنب اصحابك الفوتشي صدقني الاسرى اللي محتج عليهم اول حاجة حيديروها بعد مايطلعوا يحطوك في كوفني السيارة ويدفوها في النيل ويقولولك وين كنت ياهراب.
- كلنا مقدرين حزنكم وقهركم عالي داروه الجردان في بعض الحرائر من انتهاكات جسدية ومن نشر لصورهن الخاصة وكل الافترائات اللتي طالت سمعتهن لكن مايعنيش ابداً انك كل شوية تنشر مقالات وصور تنال من عرض رموز نسائية فبرايرية من امثال غيداء تواتي وايمان العبيدي وهناء الحبشي (هذا لو افترضنا جدلاً ان غيداء من النساء ) صحيح هم البادين لكن تهيالي زي اللي سمعتكم تقولوا اننا اصحاب مبادئ وقضية.
- ماتقعديش تلفي في صفحات الجردان تسبي فيهن ليل نهار عشية صبح ودايرة تاغ لكل صفحات الطبخ والموضة المتجردنة عشان تاخذي المقادير الصحيحة لكاب كيك النوتيلا (يامصلحجية)
- الثبات على المبدأ يجنبك المواقف الحرجة، مش فلان اليوم وطني ومناضل وحر وهو الحل والاجابة والباسوورد وبكرة العصر تطلعه عميل وجرد وامتاع احداثيات ولقيط وينقي في خشومه
ماحدش حيصدقك بعدين، على اساس فيه حد مصدقك توة
- خليك موضوعي ومنطقي هذا لمصلحتك صدقني لما تقول اقترب الحسم وساعات وليس ايام تفصلنا عن ساعة الصفر وتفوت شهور وسنين وداعش راكبة في البلاد زي الوباء هذا يعني امرين يأما نحنا فقدنا الاحساس بالزمن او انك من جماعة صليل الصوارم وانك كنت تقصد حسم الدواعش.
- لازم جميعاً نتفق ان الوطنية لوحدها لتولي المناصب المصيرية لاتكفي ،الكفاءة مطلوبة كذلك ماينفعش يتولى شخص ما تمثيل رابطة المهجرين مثلاً او الاسرى وكل مؤهلاته انه كان يوقف ينظم في الشيل ايام الاحداث. يعني مهجرين واللي يمثلنا مودر هلبا هكي
- لو نسيت فقرة ياريت تكملوها ولنا عودة لتكملة الدليل
- أم واكيم

اللهم اننا من انصار الاخضر فانصرنا وابعد علينا الوان البؤس والشقاء ..

الثبات على المبدأ يجنبك المواقف الحرجة، مش فلان اليوم وطني ومناضل وحر وهو الحل والاجابة والباسوورد وبكرة العصر تطلعه عميل وجرد وامتاع احداثيات ولقيط