السفارة الليبية بالزمالك مش عاملة حساب الليبيين بتعمل حساب لكلب

Shady Sherif .
9 h · Le Caire, Gouvernorat du Caire, Égypte ·

انا شغلي مكانه في الزمالك في مكتب دور عالي بيبص على سفارة ليبيا. النهارده أول ما وصلت المكتب الصبح لقيت الناس متضايقة جدا ومنهارة لأنهم شايفين من بلكونة المكتب عندنا (بتطل على السفارة) كلب صغير على سطح المبنى مربوط بحبل ومن الصبح عمال يصوت ويطلع أصوات تقطع القلب وعمال يجري مذعور يمين وشمال بيحاول يخلص نفسه من الحبل ومن كتر ما بيعمل كده لف الحبل على رقبته وشكله خلاص كان بينازع ويطلع في الروح. و عرفت منهم انهم و كتير من السكان حاولوا يتكلموا مع أي حد في السفارة دون أي رد فعل من مسئولي الأمن بالسفارة !
نزلت جري على المبنى تحت وحاولت اتفاهم مع موظفين الأمن (3 ليبيين وواحد مصري) وأشرح لهم الموقف وان الكلب بيموت. ولا الهوا! ساعة ونص واقف بهاتي معاهم عايزهم يا اما ينزلوا الكلب يا اما يخلوني اطلع أخده انا اوديه لأي دكتور قريب وهم رافضين تماما. وبيقولوا لي أن صاحب الكلب واحد اسمه ميدو (تقريبا حد من اللي شغالين في السفارة) ومسافر شهر العسل وسايبه مربوط كده فوق وانهم ما يقدروش يعملوا حاجة!
منتهى قسوة القلب وعدم التقدير وانعدام الرحمة. قلت لهم خدوا بطاقتي ونمرتي احتفظوا بيهم لو قلقانين وهاتولي الكلب بس أنا أوديه لأي مستشفى لسه نقدر نلحقه، مفيش برضه!
بعد كل الخناق والزعيق ده لقيت واحدة طالعة من السفارة يبدوا إنها موظفة كلمتها شرحت لها الموقف، ندهت على حد من جوا كان متعاون جدا واتكلم معاهم وقدر إن هو يدخلني أشوفه. وبعد ما دخلت - كان فات كده ساعتين تقريبا صوتي جايب آخر الشارع من الزعيق- لقيت الجنايني جي من جوا يقول لهم إن الكلب خلاص مات وقدامي شالوه حطوه في شوال زي ما باين في الصور.
دلوقتي فيه كلب مات بسبب اهمال واضح ومباشر من موظفين ومسؤولين السفارة الليبية. مين المسؤول عن تصرف زي ده؟ إزاي يتساب كده مربوط ومحبوس في عز الحر ولوحده وشكله أصلا كلب صغير ميجيش عمره سنة. لازم المسؤولين بتوع السفارة دول يتحاسبوا وصاحب الكلب يتحاسب على ده. إزاي يعني فيه ناس ما عندهاش رحمة ولا أي تقدير كده؟ هو ده مش روح برضه؟
أنا فعلا مش لاقي كلام أقوله أو أقدر أوصف بيه أنا حاسس بإيه ولا عارف إيه الهدف من البوست ده غير إني أكيد نفسي ولاد *٪&$^# اللي قعدوا يعزموا عليا بشاي و قهوة و هما مستغربين هو أنا متعصب ليه يتربطوا نفس الربطه في عز الشمس لحد ما يحسوا اللي الكلب ده حس بيه ومات بسببه