بيش نحتفل؟؟

بيش نحتفل؟؟ بدموعنا ؟؟ بمرار؟؟
والا بمصايب واجــــــــــدات كبار؟؟
بيش نحتفل؟ بالدم؟؟
والا بسطير جروحــــــــــنا والهم؟
والا بتراب يريح مايلتـــــــــــــــم؟
بأحزاننا؟؟ وعياطنا؟؟ بالنـــــــــار؟
بيش نحتفل؟ يامحتفل.. بالسم؟؟
هاللى أنتشر فى جسمنا المنهار
بيش نحتفل؟ كيف نحتفل؟؟ بالغم
وكيف نحتفل ونا فقــــــــــدت ديار
بيش نحتفل؟؟ بأوجاع؟؟
كيف نحتفل فى وطن تاه وضـــاع
وكيف تحتفل ؟؟ يامحتفل بضياع؟؟
ويافرحتك وأنـــــــــت فقدت أسوار
بيش نحتفل؟؟ كيف نحتفل بضباع؟
حكمن وصارن يارفيــــــــــــق اكثار
وكيف نحتفل؟؟ ليبيا بقـــــت تلتاع
لها ويـــــــــــــن ماشافت زها نوار
كيف نحتفل؟؟ بالعين؟؟
وكيف نحتفل بوجود ســـراقيــــــن
وبيش نحتفل؟؟ بإخوان مسلمين؟
وكيف نحتفل ع الأرض قنـــــــدهار
وكيف نحتفل؟؟ جاك الجواب لسين
ومامن حكاوى وواجدات أخبــــــــار
وكيف نحتفل والظلم مكيـــــــالين
سجن ووجيعة وقــــــــتل وإنفجار
وكيف نحتفل ف الوطن مخطوفين
وبيش نحتفل ياصاحبى كيف صار
غير قولــــــــــــى وينه زهانا وين
وماتلومنى كونى وجـــــدت أعذار