عومي في الظلام وضوقي مر تغيير النظام .. هنيآ لك

راس البيت للشاعر محمد علي بلحاج
يقول فيه '''"
عومي في الظلام
وضوقي مر تغيير النظام .. هنيآ لك
___________________________
قال صلاح سرير
يعشم بوخميس
ضوقي قهر عومي في الدميس
قابل صهد يقتل فالتريس
موش امغير يقتل فالحمام
لاهو دي لاهو قول فيس
شي اكيد مايبي كلام
بالك تو يقتل كم تيس
حشا السامعين وايحيد الظلام
____________________________
قال الشاعر عبدالسلام الفالح
حوسي في ضلامك
جاك المر من طيحت نظامك
كانن فوق في العالي اعلامك
ويانك تو تميتي اركام
شوفي الفرق كيف كاين مقامك
وشوفي تو يابلاد الكرام
جاك جذب كسرلك ارمامك
طحتي نين تميتي عرام
_______________________________
وقال الشاعر شاعر بيكم شاعر
حوسي فالسواد
وغﻻء لسعار وافﻻس وكساد
وحرب وقتل واركام او رماد""
علي هالحال ليكي كم عام""
نبو دبي اتواحشنا تشاد""
وماﻻبراج حلمي حوش تام""
تحلف كان زايرها جراد""
يباس وبور واﻻغلب احطام""
يلي قبل من اسمك ابﻻد""
وعندك جيش واركان وتمام""
وعندك مال اكثر مالرشاد""
وعندك خزن فارضك نفط خام""
ودعم اﻻكل ماهوش اعتماد""
في هالوقت في يدين النجام""
واستثمار جايبلك ايراد""
لعبو فيه مفرخ هالحرام""
_______________________________قال الشاعر الزادمة الفرجاني
حوسي في الكدرْ
وذوقي مر يسحب فيه مرْ
لعبو فيك خيان وكفر
ْظنا الأجواد سموهم أزلام
طريقك شوك مليانه حفرْ
ايقودو فيك في مسرب أوهام
وقالو جاك من ثائر وحرْ
وجايب خير لاونّه عرام
وخمس اسنين ماقابل خبرْ
امغير الفن فأنواع الإجرام
ومنظر شين ماحاجه اتسرْ
وبالتهجير قطعوهن أرحام
ويامولاي ياعالم السرْ
اتشيل الهم واتجلي غمام
وترحم ناس قاتلها الشرْ
اتبدل حال في شهر الصيام...
_______________________________
قال الشاعر محمود التمامي
من فعل الانذال
دمار الوطن مافية اقوال **
دارو شي لين فات الخيال **
وهم في الاصل من نوع النعام **
اقلال الخير قطعة ارحام **
وبهالفعل عاجبهم الحال ***
خراب وفك خلوهن احطام **
افروخ حرام مهمشي حلال **
اقلال الدين مافيها كلام **
وان كذبتني تربح تعال **
وشوف ابراج خلوهن عرام **
_______________________________
قال الشاعر Ashraf Elrpey
حوسي يالحره
يم جبين ناير يالغره
سبع اسنين دارن فيك جره،،،،
واصحاب الحق تمولك اخصام،،،،
ورزق ضناك كله صار بره،،،،
وزاطو فيه وكالة حرام،،،
ايجي طماع وايعاود الكره،،،
لحرمة وطن مادار احترام،،،،
وفيه اللي ماغير مقره،،،،
لاهو فيك قابضهن اسوام،،،،
وحاسب يوم مامنه مفره،،،،
يوم احساب من ربك الزام،،،،
سبحان اللي مايهملش دره،،،،
وعنده كل حاجه بالجرام،،،
مفتوحة المشاركة للجميع حسب رويته مهما اختلفنا نتفق علي الوطن