كبر ولدي

في سبع سنين
كبر ولدي اللي كان صغير ... وطبس يبرم في شنيباته
دار جناوح يبي ايطير ... ولا ريح امه ولاخواته
النهار راقد وفي الليل ايسير ... كل ليله اراجي ف قتلاته
شباب ضاع تحت التكبير ... والاعور بارك خطواته
محلله كل شئ ايدير ويكبر معاه ف غزواته
متناسي ان ربي كبير .. وكيف بيقابله يوم مماته
وهلي كله اليوم ايصير .. كله مسجل ف حسباته
نصيحه مني ف الاخير ... للي النكبه يومها خذاته
زغاريد ونفخ وتصفير ...وفارح بالناتو وضرباته
العبره دوم ف الاخير ...اسمع يابياع خواته
قريب يبداء يوم التحرير ... ويروح الماضي وعلاته
-------
فوزي التير (هبوب الريح العجيلي)