عذرا ... انا لا احترمكم

هلوسات أبو حسين

يعطيك العافية يا وطن ، يا سهران عا أمن البلاد والعباد ، يعطيك الف الف عافية

عم تتعبو والله ، كل النهار عا هلطرقات كرمال أمنا وسلامتنا
ما تاركين عرباية خضرة تبسط وتسترزق إلا وصادرتوها
ما تاركين حدا مش حاطط حزام إلا وعملتولوا ظبط
ما تاركين واحد ماشي عا اوتوستراد ومسرع نتفة إلا وعملتولوا ظبط سرعة
برافو عليكون
أهم شي حاجز الجمارك ، هيدا الي فارض هيبتكون ، كيف لكين ، هيدا إلى عم بيصادر كل بضاعة محملة بربيد أو فان أو كميون ، طبعا هاي نفس البضاعة الي مرقت عن البور هوي صادرها ، انتو مش فاهمين ، هاي خطة ، بيقبضو علی البضاعة عالبور وبيصادروها عالطريق هيك بيكونو ظحكو عالمهرب ، كيف لكن

وحاجز الميكانيك
هيدا لازم نرفعلو الطاقية احتراما ، معقول انت يا مواطن مش دافع ميكانيك ؟ لك هالقد مستخف بدولتك ولك ؟؟ العمی

بخصوص دوريات المخافر عا مخالفات البناء هيدا شي بيخليني افتخر فيكون ، يا خي شعب ابخفش الله ، عم بيخالف وكانو افش دولة بيصير هالحكي ؟ طب هالدركي من وين بعيش ؟

وغيرو وغيرو من جهودكم الجبارة لتأمين راحتنا وسلامتنا
صراحة بهنيكم من كل البي
بس بركي بطريقكم بترجعو هيبة هالدولة بغير طريقة
انو بركي ما بتروحو تترجو قطر لتساعدكم تحررو اسراكم
أو تطلبو من تركيا الوساطة
بركي بتتحركو صوب جرود عرسال بمحاولة ولو خجولة لتحرير هالاسری
بركي بتكمشو هالكم ازعر إلى كل يوم بيطلعو عالتلفزيونات بيحرضو وبيسبو الجيش والدولة والشيعة
بركي بدل ما تشحدو شواكيش من أمريكا لدعم الجيش بتطلعو شوي صوب إلى عم يترجاكم تقبلوا بتجهيز حقيقي للجيش
ساعتها يمكن احترمكم
أما هلئ فعذرا

انا لا أحترمكم