الفضائية السوريّة وسيادة "الافوكاتو"..

من طرف السهم الناري الأحد نوفمبر 23, 2014 11:54 pm

طوني حداد

هنا دمشق..

هلق اذا كنت مواطن (عابرسبيل) في أحد شوارع دمشق الشام وسمعت صوت انفجار ضخم وطرت بالهواء وانخبطت على بعد عشرة امتار وشميت ريحة حريق (لحم مشوي) وغبرة عافطة , وسمعت صراخ هيستيري ..وأبواق سيارات اسعاف ورأيت سواقي دم وأشلاء بشريّة في كل محيطك المنكوب ,وتوقّعت انها واصلة لسطح البنايات, لكن-ياللسرور- قدرتْ تقوم ..!
تهبّ وتطير, وتكتشف بأنّو ماتكسّرت اجريك وفيك تهرب, فأطلقتَ عنان قدميكَ للريح وركضت..ركضت كوعلٍ مذعورٍ في الغابة.. وبلاد تاخدك وبلاد تجيبك وبعدين اكتشفت انّك بشارع بتعرفو.. شايفو من قبل..من أيام طفولتك..شارع قريب من بيتك (يامحاسن الصدف)..
واستجمعتَ عضلاتك وعقلك وحدّدت البوصلة وانطلقتَ بتركيز متل (حلاوة الروح) الى منزلك ووصلتَ اليه..دخلت… لقطت أنفاسك.. شربت ماء. .. وضحكت كمن يتلو وصيته قبل اعدامه..
نعم هو بيتي..!
وصلت على بيتك من حيث لاتدري وتدري..!
وبوجك (عالتواليت) لحقت حالك قبل ماتبول بتيابك من الرعب, وبعدا عملتْ دوش وغفيت من التعب والذهول ووعيت (استيقظت) بعد 4 ساعات وفتحت التلفزيون (عادة سيئة من عاداتك) وقرأت على الفضائية السوريّة خبر عاجل يقول:
انفجار سيّارة مفخّخة الآن منذ لحظات في مكان (كذا) ..
وهو المكان الذي كنتَ فيه من 4 ساعات..!
هذا يعني ببساطة أنّك ما فطستْ ..!
شكراً للمصادفة السعيدة..
مازلتَ على قيد الحياة..
ياللسرور..
شكراً للفضائية السوريّة على المتابعة الحثيثة..!
شكراً للتلفزيون الرسمي “وكاميرته الخفيّة”..!
كلّفت خاطرك مسيو “عمران الزعبي”..
أزعجناك بها الليل..
ماتواخذنا على حبّ النبي يامعالي الوزير..
روح نام معاليك ..
مافي شي مهم..
شوية عالم فائضين عن الحاجة “نفقوا”..
لاتعتل همّ..
مش مستاهلين تزعجوا تلفزيوناتكم عشانهم..
حديد بحديد وشركة التأمين بتدفع حقّ الدمّ “الرخيص”..
مرسي ..أروفوار يامعالي المحامي يللي في غمضة عين صرت وزير اعلام وتمّ التجديد لك في الوزارة الجديدة بسبب “مهنيتك” اللافتة..!
عبقري اعلامي حضرتك مسيو “زعبي”
لكن من بعد أمرك معالي الوزير غداً وأنت تحتسي قهوتك في مكتبك الوزاري..فكّر بالبصمة يللي رح تتركها بعد ماتغادر كرسي الوزارة..
الهيئة معاليك بصمتك مش بالابهام..
بصمتك بالأصبع الوسطى ياسيادة “الأفوكاتو”..!