تم ارجاع الطفله (هزار عبدالفتاح الصقري) والتي كانت مخطوفه في طرابلس لمدة تلاتة ايام وذالك بدفع فدية قدرها 100الف دينار

الزاوية من قلب الحدث

تم بحمدالله ارجاع الطفله (هزار عبدالفتاح الصقري) عمرها 12 سنة والتي كانت مخطوفه في طرابلس لمدة تلاتة ايام وذالك بدفع فدية قدرها 100الف دينار ورجعت بالسلامة الي اهلها الحمدلله علي السلامة ياهزار .

الحمدلله على سلامتها وان شاءالله المال الذي اخذه المختطفون يكون وبالا عليهم

نقلا عن "كلام الحق وجاع يا ليبيين "

~ رسالة من إحدى الآخوات !

هل وصل بينا الحال في ليبيا الي خطف البنات .... اليوم صارت حادثة اختطاف قدام عيون امي وعيلتي واني القصة هزتني وابكتني بصراحة ......لا ومش هكي بس خطف في عز الظهر وقدام عيون الناس ....اليوم انخطفت بنت في السياحية الساعة 2 الظهر قدام محل حلويات الصفاء وقدام الناس واصحاب المحلات ومفيش حد انهزت فيه شعرة وساعد البنت ....... كانت راكبة في سيارة اطلقوا علي سيارتها رصاص وقفوا سيارتها ونزلوها .... البنت حاولت تهرب قريب 3 مرات وتعيط وتستنجد بي الناس وللاسف مفيش حد ساعدها ... البنت لما شبحت ماما ادافع عليها قعدت تعيط وتشير با ايديها وتقوللها تعاليلي ......البنت محجبة حولولها حجابها وشدوها من شعرها والخاطفين فروخ صغار من عمر 20 -21 ... لما اني قاتلهم ساعدو البنت ديروا حاجة قالولها هادي ليبيا يا خالتي ...... يغني لدرجة هادي ليبيا اصبحت اكبر مقر للعصابات ... اصبحنا مهزلة قدام العالم .. البنت كانت ممكن تكون اختك شرفك وعرضك ترضي هكي في بنت بلادك