د. موسى إبراهيم:ياخوتي الأحرارلا تفقدوا البوصلة

أسمعوني ياخوتي الأحرار: لا تفقدوا البوصلة، بوصلة معمر القذافي وأبوبكر يونس والشاوش وجبران والهنشيري وأولاد العربي. تبوا تبكوا ع الشهداء؟ عندنا قوافل منهم أطهر من الملايكة. أما الذين تراقصوا على طبول الناتو وجلبوا العار لأنفسهم ولأهلهم ف 2011 فلو قاتلوا خوارج الأرض جميعاً لن نبكيهم. ممكن نحكوا معاهم، نتفاهموا علي حل من أجل خاطر البلاد ماتريحش، ننسقوا جهودنا بيش نغلبوا ميليشيات الزنادقة، لكن نقرعولهم؟ لا والله، نبكوا عليهم؟ نحطوا صور الفوتوشوب متاعتهم علي بروفايلاتنا؟ مازال غير نسموا عليهم!! من الجميل إنه يوجعنا شباب ليبيا اللي رايح في المعارك اللي ماكانش اصلا مفروض تصير لو الفبرايريين عندهم عقل أو ضمير، كل ليبي يموت هذا دم رايح، لكن جماعة الرقص مع الناتو خونة، خونة، خونة، ولو ما انشغلوش بالخوارج راهم كسدوا علينا احني وكملوا باقينا..
شر البلية مايضحك: يتحالفوا مع الزنادقة ضد ثورة الفاتح، ويدمروا جيشنا، ويذبحوا اولادنا، ويخربوا كل شي... الشرطة والدولة والمعسكرات والقضاء والسيادة.. ويجيبوا الناتو، وتوا لما يختلفوا ع الغنائم والسلطة يبونا نبكوا عليهم. رانا بعقولنا ياجماعة... وقلوبنا اللي مازلبحها الناتو في 2011 مازالت هي هي.
تبوا تقرعوا للتريس؟ اقرعوا لضنانا في زنزانات فبرابر، والتريس اللي ماخان رغم الصواريخ اللي تطلع من باطن البحر من الغواصات النووية!! اقرعوا لاولادنا من المشاشية الأحرار إلى عند الحسون المغاوير. اول مرة نكتبها هكي ... بالعامية... يوجعني اختلاط الموازين.... ومساواة التريس في سوق الرجولة ظلم. اقروا الفاتحة بالله علي ارواح اولاد العربي في بوسليم، وعلي جميع شهدائنا. سامحوني في غضبتي.