بعد ما هدينا كل شئ بيدينا – صار المعاش اليوم بالتقطير المصدر

وكم من خيرات ربي عطاها لينا -  وياما تصدقنا على غيرنا وعطينا
وبعد ما  هدينا كل شئ بيدينا – صار المعاش اليوم بالتقطير
واهي الايام دارت وبرمت بينا – بعد ماكنا عايشين ف الخير
بدينا نستجدى مادين ايدينا – من قال هذا في ليبيا بصير
بعد غيبتك اليوم ياغالينا –صار الوطن مرهون بيد الغير
جذران في النفط يسرق فينا – وحفتر والنصره ف الشرق نازله تدمير
وفالغرب معاد طائره بتجينا  بعد المطار راح امشى تدمير
والضي هارب قليل وين ايجينا –وعلى الخبز واقفه طوابير
والغاز وين تحصله ياخينا - نحمد الله مازال فحم كثير
وم المرض قول ياالله احمينا – ان مرض ولدك قول كيف ادير
لا عاد مستشفى ولا طبيب يداوينا - وان دخل ولدك تفقده ويطير
و مصراته وبالحاج والشرادم فينا- كم سجونهم معبيه باسير
وكم من شباب رحلت اليوم علينا –في جنة الفردوس مرفرفه بطير
واللي وجعني اليوم ياغالينا – كمشه تنابل مسيره مالغير
و ديكهم الاعور اصدر فتوه علينا – قال للدجاج الهف مع التكبير
القتل والسرقه حلل فينا – قال حلال ف الازلام كل شئ ايصير
و اللي زمان كان  تابع لينا -   قال واجب عليكم تشكروا والا تكونوا حمير
وآخر كلامي واجب نوحدوا ايدينا - وكل ماحدث لينا سببه التقصير

ـــــــ-ــــــ-ـــــ-ـــــ-ــــــ-ـــــــ-ـــــ-ــــ-ــــــ-ــــــ-ـــــــ-ـــــــ-ـــــــ-


هبوب الريح