الشاعر علي الكيلاني:يهودي بجواز ليبي وجوازي مصادر

الشاعر علي الكيلاني:يهودي بجواز ليبي وجوازي مصادر

لفت انتباهي ، بل شدني اعتزاز اليهودي (رافائيل ) بهويته وجوازه الليبي ، وهو يرتدي (الكيباه الطاقيه اليهوديه)
منظر ، استفزني ، انا العربي الليبي الاصيل بعمامتي ، ( خاصه ) والمصادر جواز سفري
والمسحوبه هويتي ، العربيه الليبيه ، فقلت :-

يهودي بجواز ليبي وجوازي مصادر
بخته ، ، صعد راقي ، وبختي ، حادر

ما معناه ،
موش وقت (خاصه) وقت (للكيباه)
ريحه ، تحطبله ، ،العون اعماه
لي ليبيا ، وارد ونا ، اللي صادر
بعمامتي ونجعي ، ومن يهواه
ماهوش لينا الوطن ، برا، الكادر
نحيد، العمامه ، وقتها ، ننساه
ندير بار في شط المحيط الهادر

ماتبيش دليل
قدامكم ، ، بسبور ،، رافائيل
وإنا اللي (لاجي) وهو الاصيل
وهو مسك مصراته ، ونا النشادر
جواز سفر ليبي ، ودولته اسرائيل
يدخل ، متي يبي ،ونا اللي مغادر
هاذي ،،نتيجة ، غزو ، لساطيل
اللي ما فهمها حد غير ( النادر)
تبي ،فهم من يفهم ، وشرح طويل
وتبي معجزه ،من عند عالم ، قادر

الشاعر علي الكيلاني