قصيدة الشاعر الكبير عبد السلام بوجلاوى عند زيارته لقبر البوعزيزى فى تونس يوم 2013.10.22 والتى قال فيها ..

الله يرحمك يادرت فينا حوسه***وراحت ورا روحك ارواح بريه
دفعنا ثمن تكسيرة الكروسه*** واللي كسرت كروستك شرطيه
خلصت في اطرطيشة اخيار وكوسه*** بارواح مالعرب يمكن الطرف بميه
ماتزعلك لوكان مي مرفوسه*** ولا كنت تزعل من اخياب وليه
سوا دخلك مولاك في فردوسه*** سو بعملتك فالهود رحت ضحيه
ابداحسه مع غبراه وابَّاسوسه ***ان عاد الزمان اتكون جبت بليه
نحكيلك سوا سمحه سوا منحوسه*** نتيجة وفاتك كان تسمع فيّه
بعد ولايتك ثارت ولاية سوسه*** وثار كل من داخل الجمهوريه
ودوم ايتظاهر من شقاه وبوسه*** وترجع اوضاعه لوله عاديه
كان ماوجدت الخبز كل بسبوسه*** تقول للفقير الرايقه الهنيه
والجيش اّمره يحضر اخرب كردوسه ***وساعد اصفوف الشعب سلمك ديه
يريده يملا مالشباب احبوسه ***قال الاخ مايحبس ويقتل خيه
هضاك وين ريسكم فهم مريوسه*** ولكن بها بلكـل هلب كرسيه
ونحنا لذبح الشعب طيّب موسه ***مغير انت عارف ليبيا نفطيه
مندوبنا سوا صدفه سوا مدروسه*** بكا ابكيته بكا الامريكيه
وكون من ربط فالبور جا للنوسه*** صارت ايجابيه سوا سلبيه
وبانت اللي في مامضا مدسوسه ***واضحه اقبال العين مي مخفيه
المارد كرس مالخوف في فانوسه*** وقول ماتريد اطلب انسيه نسيه
تكدت وردت كيف قبل عبوسه ***اوجوه نورت بالنصر في باديّه
فاتحينها يمكن وهي منكوسه*** ان كان العسل من فوق فالبتيّه
ولا عروقهن في الارض مي مغروسه*** اورود الربيع اتكون صناعيه
سعادة العريس وفرحته بعروسه ***تضيع وين مادارت معاه خطيه
يضحي اوقات ابتعبته وافلوسه*** ان كان عد عشرتا اتكون كديه
ان ما خوفتا ضربة القطوسه*** اتموت العروق بقطع راس الحيه
مايطمع السراق فالمحروسه*** يجنح بعيد ان شافها محميه
وما يحفظن مخزونهن مالسوسه*** ان كان المخازن عالخيا مبنيه
لوكان ما الديك امنحيات اجروسه*** مالقط يقرب حومة البونيه
بكثرة اصياحه ماحما فلّوسه *** لا له مخالب لا انياب قويه
نقول في حقائق واضحه ملموسه ***مغير هيت من يفهم المسئوليه
ماتنخدع في شخص من ملبوسه ***الثابت الجوهر والغلاف عريه
ما يغربك كاطه ولا برنوسه ***مرات شخص قاصر مايفك لويه
حتى وهم العاقل طوحو قاموسه*** ماحد يفسر في معاني ديه
ولاخر اطور بدل البوخوصه*** بمدفع امبوج فوق من صينيه
بيش تكسر الفرعون مانك موسى*** ولانك على طرقة الله ونبيه
عود خير من نص الطريق العوصه*** انسدت وماعندك عصا سحريه
ولاكن الشعب الطيبات انفوسه*** صامد ايريد العدل والحريه
افداهن أيهوّن فالمعارك روسه*** ادما شهُاداه الطاهره الزكيه