ﻫﻠﻮﺳﺎﺕ ﻟﻴﺒﻲ ...

ﻫﻠﻮﺳﺎﺕ ﻟﻴﺒﻲ ...
ﺗﻮ ﻣﺶ ﺍﺳﺘﻘﺒﻞ ﻭﻭﺩﻉ ﻭﺍﻟﺘﻘﻰ ﻭﺃﻓﺘﺘﺢ ﺧﻴﺮ ﻣﻦ ﺃﻧﺪﻟﻊ ﻭﺃﻧﻔﺠﺮ
ﻭﻗُﺘﻞ ﻭﺍﻧﺴﺤﺐ !!
ﻭﺗﻮ ﻣﺶ ﻛﺎﻥ ﻧﺘﻔﺮﺟﻮﺍ ﻋﻠﻰ ﻣﺆﺗﻤﺮ ﺍﻟﺸﻌﺐ ﺍﻟﻌﺎﻡ ﻓﻲ ﺩﻭﺭﺗﻪ
ﺍﻟﻌﺎﺩﻳﺔ ﺍﻟﺜﺎﻧﻴﺔ ﻟﻠﻌﺎﻡ ﺍﻟﻤﻴﻼﺩﻱ 2014 ﺧﻴﺮ ﻣﻦ ﻧﺘﻔﺮﺟﻮﺍ ﻋﻠﻰ
ﻣﺆﺗﻤﺮ ﻭﻃﻨﻲ ﻓﻲ ﺍﻟﻐﺮﺏ ﻭﺑﺮﻟﻤﺎﻥ ﻓﻲ ﺍﻟﺸﺮﻕ ﻭﻧﻬﺎﺭ ﺃﺣﺮﻑ ﻓﻲ
ﺍﻟﻮﺳﻂ ﻭﻧﻬﺎﺭ ﻣﻐﺒﺮ ﻓﻲ ﺍﻟﺠﻨﻮﺏ !!!
ﻭﺗﻮ ﻣﺶ ﻛﺎﻥ ﻧﺎﺩﻱ ﻭﻓﺎﻕ ﺍﻟﺰﺍﻭﻳﺔ ﻳﻠﻌﺐ ﺿﺪ ﺍﻟﺼﻘﻮﺭ ﻓﻲ ﻃﺒﺮﻕ
ﻭﻧﺎﺩﻱ ﺍﻟﺴﻮﻳﺤﻠﻲ ﺍﻟﻤﺼﺮﺍﺗﻲ ﻳﻠﻌﺐ ﺿﺪ ﻧﺎﺩﻱ ﺧﻠﻴﺞ ﺳﺮﺕ ﺧﻴﺮ ﻣﺎ
ﻧﺘﻔﺮﺟﻮﺍ ﻋﻠﻰ ﺍﻟﻔﺠﺮ ﺿﺪ ﺍﻟﻘﺒﺎﺋﻞ ﻭﺍﻻﻧﺼﺎﺭ ﺿﺪ ﺍﻟﻜﺮﺍﻣﺔ !!
ﻭﺗﻮ ﻣﺶ ﻛﺎﻥ ﻧﺘﻔﺮﺟﻮﺍ ﻋﻠﻰ ﺑﺮﻧﺎﻣﺞ ﻗﺎﻝ ﺻﺎﺣﺐ ﺍﻟﻌﻘﻞ ﻭﺟﺎﺋﺰﺓ
ﻋﻠﻰ ﺍﻟﺨﻂ ﺧﻴﺮ ﻣﻦ ﻧﺘﻔﺮﺟﻮﺍ ﻋﻠﻰ ﺑﺮﻧﺎﻣﺞ ﺻﺤﻮﺓ ﻭﻃﻦ ﻭﺑﺮﻧﺎﻣﺞ
ﻣﺴﺎﺀ ﺍﻟﺮﺳﻤﻴﺔ !!
ﻭﺗﻮ ﻣﺶ ﻛﺎﻥ ﻧﺘﻔﺮﺟﻮﺍ ﻋﻠﻰ ﺷﺄﻧﻨﺎ ﺍﻟﺪﺍﺧﻠﻲ ﻓﻲ ﺍﻟﻨﺸﺮﺓ ﺍﻟﻤﺤﻠﻴﺔ
ﺧﻴﺮ ﻣﺎ ﻧﺘﻔﺮﺟﻮﺍ ﻋﻠﻰ ﻋﺎﺭﻧﺎ ﺍﻟﺪﺍﺧﻠﻲ ﻓﻲ ﺍﻟﻘﻨﻮﺍﺕ ﺍﻟﻌﺎﻟﻤﻴﺔ !!
ﻭﺗﻮ ﻣﺶ ﻛﺎﻥ ﻧﺸﻮﻓﻮﺍ ﻓﻲ ﺍﻻﺧﺒﺎﺭ ﻓﻲ ﻣﻮﺟﺰ ﺍﻟﺴﺎﻋﺔ 7 ﻭﻧﺸﺮﺓ
ﺍﻟﺴﺎﻋﺔ 9 ﻣﻮﺟﺰ ﺍﻟﺴﺎﻋﺔ 12 ﺧﻴﺮ ﻣﻦ ﺍﻧﺎ ﻧﺸﻮﻓﻮﻫﺎ ﻃﻴﻠﺔ 24
ﺳﺎﻋﺔ !!
ﻭﺗﻮ ﻣﺶ ﻛﺎﻥ ﻓﻲ ﺷﺮﻳﻂ ﻗﻨﺎﺗﻨﺎ ﺍﻟﻔﻀﺎﺋﻴﺔ ﻳﻜﺘﺒﻮﺍ ﻓﻲ ﺍﻻﻋﻼﻧﺎﺕ
ﺍﻟﻤﺒﻮﺑﺔ ﺧﻴﺮ ﻣﺎ ﻳﻜﺘﺒﻮﺍ ﻓﻲ ﺍﻟﻤﺂﺳﻲ ﻭﺍﻟﺴﺐ ﻭﺍﻟﺸﺘﻢ ﻭﺍﻟﻄﻌﻦ
ﻭﺍﻟﺘﺨﻮﻳﻦ ﻭﺍﻟﻘﺘﻞ ﻭﺍﻟﻘﺼﻒ ﻭﺍﻟﺘﻬﺠﻴﺮ ﻭﺍﻟﻨﺰﻭﺡ !!
ﻭﺗﻮ ﻣﺶ ﻛﺎﻥ ﺗﺘﻔﺮﺟﻮﺍ ﺯﻱ ﻫﺎ ﺍﻟﻮﻗﺖ ﻋﻠﻰ ﺃﻏﻨﻴﺔ ﻋﺒﺪ ﺍﻟﻬﺎﺩﻱ
ﺑﺎﻟﺨﻴﺎﻁ ﻏﻨﻴﻠﻲ ﺍﻟﻠﻴﻠﺔ ﻏﻨﻴﻠﻲ ﻣﻦ ﻋﻤﻖ ﺍﻟﻘﻠﺐ ﻭﺍﻧﺖ ﺣﺎﻁ ﺍﻳﺪﻙ
ﺗﺤﺖ ﺭﺃﺳﻚ ﺧﻴﺮ ﻣﺎ ﺗﺘﻔﺮﺝ ﻋﻠﻰ ﺻﻮﺭ ﺍﻟﺪﻣﺎﺭ ﻭﺍﻟﻘﺘﻞ ﻭﺍﻧﺖ ﺣﺎﻁ
ﺍﻳﺪﻙ ﻋﻠﻰ ﺭﺃﺳﻚ !!
ﻭﺗﻮ ﻛﺎﻥ ﺗﺘﻔﺮﺝ ﻋﻠﻰ ﺍﻟﻨﺸﺮﺓ ﺍﻻﻗﺘﺼﺎﺩﻳﺔ ﻭﺍﻟﻨﺸﺮﺓ ﺍﻟﺠﻮﻳﺔ ﻭﺍﻧﺖ
ﺗﻬﺰ ﻓﻲ ﺭﺟﻠﻴﻚ ﺧﻴﺮ ﻣﺎ ﺗﺘﻔﺮﺝ ﻋﻠﻰ ﺧﻮﺗﻚ ﻳﺘﻘﺎﺗﻠﻮﺍ ﻭﺗﻬﺰ ﻓﻲ
ﺭﺍﺳﻚ ﻳﻤﻴﻦ ﻭﻳﺴﺎﺭ !!!
ﻭﺗﻮ ﺳﺎﻟﺘﻜﻢ ﺑﺎﻟﻠﻪ ﻋﻤﺮﻛﻢ ﻃﻴﻠﺔ 42 ﺳﻨﺔ ﺳﻤﻌﺘﻮﺍ ﺑﻤﺪﻳﻨﺘﻴﻦ
ﻳﺘﺤﺎﺭﺑﻦ ﺍﻭﻗﺒﻴﻠﺘﻴﻦ ﻳﺘﺒﺎﺩﻟﻦ ﻓﻲ ﺍﻟﺠﺘﺜﺚ ﻭﺍﻻﺳﺮﻯ ﺃﻭ ﺷﻔﺘﻮﺍ
ﺳﻴﺎﺭﺍﺕ ﻋﺴﻜﺮﻳﺔ ﻛﻞ ﻭﺣﺪﺓ ﻃﺎﻳﺸﺔ ﺑﺮﻭﺣﻬﺎ ﺃﻭ ﺷﻔﺘﻮﺍ ﻃﻴﺎﺭﺓ
ﺑﺪﻭﻥ ﻃﻴﺎﺭ ﺗﺴﻄﺮﺏ ﻓﻲ ﺳﻤﺎﻧﺎ !!
ﻳﺎ ﻭﺩﻱ ﻳﺎ ﻋﻨﺒﻮ ﺍﻟﺜﻮﺭﺍﺕ ﺍﻟﻠﻲ ﻫﻜﻲ ﻭﻋﻨﺒﻮ ﺍﻟﺤﺮﻳﺔ ﺍﻟﻠﻲ ﻫﻜﻲ !!
ﻭﺳﺎﻣﺤﻮﻧﻲ ( ﻧﻬﻠﻮﺱ) ﺧﻮﻛﻢ ﻛﻼﻡ ﻋﺮﺏ

والله صدقت في كل كلامك