ﻫﻠﻮﺳﺎﺕ ﻟﻴﺒﻲ

ﺍﻟﺴﻤﺎﺀ ﺻﺎﻓﻴﺔ !!
ﺑﻌﺪ ﻇﻬﻮﺭ ﺗﻨﻈﻴﻢ ﺩﺍﻋﺶ ﻋﻼﻧﻴﺔ ﻋﻠﻰ ﺍﻷﺭﺽ . ﺑﻘﺪﺭﺓ ﻗﺎﺩﺭ ﺃﺧﺘﻔﺖ ﺍﻟﻄﺎﺋﺮﺍﺕ ﺑﺪﻭﻥ ﻃﻴﺎﺭ ﻣﻦ ﺍﻟﺴﻤﺎﺀ !!
ﻭﺑﻘﺪﺭﺓ ﻗﺎﺩﺭ ﺍﺧﺘﻔﻰ ﺍﻳﻀﺎً ﺍﻟﻘﺼﻒ ﺍﻟﻤﺘﺒﺎﺩﻝ ﺑﻴﻦ ﻛﺮﺍﻣﺔ ﻭﻓﺠﺮ !!
ﻭﻣﻌﺎﺵ ﻓﻴﻪ ﺩﻭﺓ ﻉ ﺍﻟﻮﻃﻴﺔ ؟؟
ﻭﻣﻌﺎﺵ ﻓﻴﻪ ﺩﻭﺓ ﻣﻦ ﺍﻟﻄﺮﻑ ﺍﻟﺘﺎﻧﻲ ﻋﻦ ﻗﺮﺏ ﺩﺧﻮﻝ ﻃﺮﺍﺑﻠﺲ ؟؟
ﻭﻣﻌﺎﺵ ﻓﻴﻪ ﺩﻭﺓ ﻋﻦ ﺿﺮﻭﺭﺓ ﺗﺴﻠﻴﺢ ﺍﻟﺠﻴﺶ ﺍﻟﻠﻴﺒﻲ ( ﺑﻴﻦ ﻗﻮﺳﻴﻦ ﻣﺶ ﺑﻴﺾ ) !!
ﻭﻣﻌﺎﺵ ﻃﻠﻊ ﺍﻟﺤﺠﺎﺯﻱ ﻉ ﺍﻟﺘﻠﻴﻔﺰﻭﻥ ﻭﻗﺎﻝ ﻣﺎﺯﺍﻝ ﺛﻼﺙ ﺍﺭﺑﺎﻉ ﺍﻟﺴﺎﻋﺔ ﻭﻧﺴﻴﻄﺮﻭﺍ ﻋﻠﻰ ﺑﻨﻐﺎﺯﻱ !!
ﻭﻣﻌﺎﺵ ﻓﻴﻪ ﺩﻭﺓ ﻋﻠﻰ ﺿﺮﻭﺭﺓ ﺍﻧﺴﺤﺎﺏ ﺣﻔﺘﺮ ﻣﻦ ﺍﻟﻤﺸﻬﺪ ﺍﻟﻠﻴﺒﻲ !!
ﻭﻣﻌﺎﺵ ﺭﻳﻨﺎ ﺍﻟﻘﺮﺍﻗﻮﺯ ﻣﺤﻤﺪ ﺍﻟﻨﻌﺎﺱ !!
ﻭﻣﻌﺎﺵ ﺳﻤﻌﻨﺎ ﺑﻤﻮﺗﺔ ﺟﺪﻳﺪﺓ ﻟﺼﻼﺡ ﺑﺎﺩﻱ !!
ﻭﻣﻌﺎﺵ ﻓﻴﻪ ﺣﺪ ﻣﻦ ﻋﻴﺖ ﺟﻼﻝ ﻃﻠﻊ ﺳﺐ ﻗﻄﺮ ﻭﺗﺮﻛﻴﺎ ﻭﺇﻻ ﺍﻻﻣﺎﺭﺍﺕ ﻭﻣﺼﺮ !!
ﻭﻣﻌﺎﺵ ﺳﻤﻌﻨﺎ ﺑﺎﻟﺠﻀﺮﺍﻥ !!
ﻭﻣﻌﺎﺵ ﺳﻤﻌﻨﺎ ﺑﺴﺎﻋﺔ ﺍﻟﺼﻔﺮ !! ﻭﻓﺸﻠﻮﻡ ﻭﺗﺄﺟﻮﺭﺍﺀ ﻃﻠﻌﻮﺍ ﻋﻠﻰ ﻛﻤﺮﺩﺍﻟﻲ ﻃﻨﺎﻃﺔ ﻣﻦ ﺑﺤﺮ ﺍﻟﻜﺮﺍﻣﺔ !!
ﻭﻣﻌﺎﺵ ﺳﻤﻌﻨﺎ ﻛﻠﻤﺔ ﻫﺎﺫﻭﻡ ﻣﺶ ﺩﺍﻋﺶ ﻫﺎﺫﻭﻡ ﺍﺯﻻﻡ ﻳﺘﻜﻠﻤﻮﺍ ﺍﻓﻐﺎﻧﻲ ﻭﺗﻮﻧﺴﻲ ﻭﺳﻮﺩﺍﻧﻲ !!
ﻭ ﻣﺮﻳﻨﺎﺵ ﻛﺮﻳﻢ ﺍﻟﻌﻴﻦ ﻳﺼﻠﻲ ﻋﻠﻰ ﺿﺤﺎﻳﺎ ﺍﻟﺘﻔﺠﻴﺮﺍﺕ ﻓﻲ ﺍﻟﺴﺎﺣﺔ ﺍﻟﺨﻀﺮﺍﺀ !!
ﻭﻣﺎ ﺭﻳﻨﺎﺵ ﺍﻟﺒﻮﺳﻬﻤﻴﻦ ﻳﺼﺪﺭ ﻗﺮﺍﺭ ﺭﻗﻢ ﺳﺒﻊ ﻭﺧﻤﺴﻴﻦ ﻣﻴﺔ ﺑﺘﻜﻠﻴﻒ ﺩﺭﻭﻉ ﺍﻟﻮﺳﻄﻰ ﻭﺩﺭﻭﻉ ﺍﻟﻔﻮﻗﻴﺔ ﺑﺘﺤﺮﻳﺮ ﺳﺮﺕ !!
ﻭﻣﺎ ﺭﻳﻨﺎﺵ ﻻ ﺍﻟﺤﻔﺎﺗﺮﺓ ﻭﻻ ﺍﻟﻘﺼﺎﻭﺭﺓ ﻳﻌﻠﻨﻮﺍ ﺳﺮﺕ ﻣﻨﻄﻘﺔ ﻋﺴﻜﺮﻳﺔ ﻭﻳﺪﻳﺮﻭﺍ ﺣﻀﺮ ﺗﺠﻮﻝ ﺣﺘﻰ ﻣﻦ ﺍﻟﺘﻨﻴﻦ ﻟﻠﺘﻨﻴﻦ ﻭﻧﺺ !!
ﻭﻣﻌﺎﺵ ﻓﻴﻪ ﺩﻭﺓ ﻣﻦ ﺍﻟﺤﻜﻮﻣﺔ ﺍﻟﻤﺼﺮﻳﺔ ﻋﻦ ﺧﻄﺮ ﺍﻟﺘﻨﻈﻴﻤﺎﺕ ﺍﻻﺭﻫﺎﺑﻴﺔ ﻓﻲ ﻟﻴﺒﻴﺎ !!
ﻭﻣﺎ ﺳﻤﻌﻨﺎﺵ ﻻ ﺍﻟﺤﻔﺎﺗﺮﺓ ﻭﻻ ﺍﻟﻘﺼﺎﻭﺭﺓ ﻭﻻ ﻣﻦ ﻳﻮﻗﻒ ﻭﺭﺍﻫﻢ ﺗﻜﻠﻢ ﻋﻦ ﺿﺮﻭﺭﺓ ﺍﻧﻌﻘﺎﺩ ﻣﺠﻠﺲ ﺍﻟﺮﻋﺐ ﻟﻤﺤﺎﺭﺑﺔ ﺍﻟﺪﻭﺍﻋﺶ !!
ﻭﺯﻱ ﻣﺎ ﻗﺎﻝ ﺍﻟﻘﺎﻧﻄﺔ ﻋﺒﺪﺍﻟﻠﻪ ﻧﺎﻛﺮ ﻧﺤﻦ ﻧﺠﻴﺐ ﻓﻲ ﺍﻟﺠﺮﺍﺩ ﻓﻲ ﺍﻟﻘﺼﻌﺔ !!
ﻭﺭﺩ ﻋﻠﻴﻪ ﻣﻐﻄﺔ ﺍﻟﺒﻴﺮﻭ ﺑﺎﺩﻱ ﺑﻤﻘﻮﻟﺔ ﺍﻟﻠﻪ ﺃﻛﺒﺮ ﺍﻟﻨﻴﺮﺍﻥ ﻣﻦ ﺩﺍﺧﻞ ﺍﻟﻤﻄﺎﺭ !!
ﻓﺎﻧﻨﻲ ﻣﻦ ﻫﺬﺍ ﺍﻟﻤﻨﺒﺮ ﺃﺣﺐ ﺍﻥ ﺃﻗﻮﻝ ﻟﻜﻢ ﺍﻟﻠﻲ ﻓﻲ ﺍﻳﺪﻩ ﺑﻼﻁ ﻳﻠﻮﺣﻪ !!
ﻟﻴﺒﻴﺎ ﻟﻴﺴﺖ ﺍﻟﺼﻮﻣﺎﻝ ﺍﻭ ﺍﻟﻌﺮﺍﻕ
ﻟﻴﺒﻴﺎ ﺍﺣﺮﻑ ﻣﻨﻬﻦ ﺍﻟﺰﻭﺯ !!
ﻭﺳﺎﻣﺤﻮﻧﻲ ( ﻧﻬﻠﻮﺱ ) ﺧﻮﻛﻢ ﻛﻼﻡ ﻋﺮﺏ